Ay deu cot, ay deu cout,
Deu pèe, deu joulh, de la haute !
Per ma faute,
Ay de pertout !

Ah ! mauditz siatz lou Rey,
Lou Rey, lou Clot, l'Esquirete,
Qui-m hètz sourti bete-a-bete
Toutz mouns peccatz, Diu qui crey
Que-m pressatz la counscience
Mielhou que nat counfessou :
Peccatz de ma counexense,
Sourtitz de boste presou !
Ay deu cot, ay deu cout,

Bielhs peccatz, la-n èy lou mau,
Que p-counfessi quoand m'en doli,
Quoand la douche dab soun oli
Me reboumbe sus lou blau ;
Toutu qu'ey bou de l'escade,
Quoand ere p'y cad d'aploumb ;
Bertrand, sabi-m la ha cade
Sus l'os qui porte toun noum !
Ay deu cot, ay deu cout,

Gran besounh d'esta regat
Qu'hauri, bère Bagnadoure,
De boste maa saubadoure.
Qu'èy nau bites coum u gat !
Si cabbat 1'os de la rée
La m- glissabetz, oh ! lou mourt,
Se quilhant ta-b da l'estrée,
Nou s'ensegneré pas court !
Ay deu cot, ay deu cout,

Ta plaa ha moun examen,
Tira la pèt au bielh houmi,
Bielhs peccatz, si cau que-b noumi,
Dab drin d'oli de cherment,
Qui Ducassou me presente,
Coupem drin l'ablutiou
D'aquere piscine sente
De purificatiou !
Ay deu cot, ay deu cout,

Biis de Luc y de Mounenh,
Datz-me drin de repeixense,
Descargatz-me la counscience ;
D'aygue caute que souy prenh !
Ajudatz-m'à d-aqueste hore,
Sens Esquirete ni Rey,
Ou dab Bayle y dab Laffore,
Louis au clot m'enterre hoey !
Ay deu cot, ay dey cout,