Jacolet se'n tonna de guèrra
Praubòt !
Croishit, lo nas de cap a tèrra
Praubòt !
Magre, eishalat, l'aire malaut,
Praube soldat d'on vietz atau ?
Praubòt !

Dama que torni de Russia
Praubòt !
Qu'èi hèit l'Espanha e l'Italia,
Praubòt !
Qu'èi set ! qu'èi hami ! borsa a plat ;
Si'm voletz dar... per caritat...
Praubòt !

Aci qu'avetz pan dab hromatge,
Praubòt !
Bon « manseng » deu noste vilatge
Praubòt !
Hètz com a vòste e shens faiçon
Botilhatz-ve lo Jurançon.
Praubòt !

Lo vin que l'escarrabelhava
Praubòt !
Per'mor bèth drin que's botilhava ;
Praubòt !
Per la fin que's met a cantar,
La dauna, autanlèu, que plorà
Praubòt !

Qu'avetz donc a plorar, daunina ?
Praubòt !
Lo vielh grenadièr que'vs chagrina ?
Praubòt !
Qu'a tròp bevut, tròp hòrt cantat ?
O que'vs hè dòu la caritat ?
Praubòt !

Si hèi puisheu, jo ne'm demori !
Praubòt !
N'ei pas lo vin bevut qui plori,
Praubòt !
Que plori lo men Jacolet
Que'm sembla que cantatz com eth,
Praubòt !

Com vos, tietz, que hase campanha,
Praubòt !
Mes que'u m'an tuat en Espanha,
Praubòt !
Qu'avètz sheis mainatges plan beths...
Vam ! adara ! que n'avetz dètz ?
Praubòt !

Jès ! quin se'm vira la cervèla,
Praubòt !
Quan avoi la trista novèla
Praubòt !
« Mari mort en brave soldat ! »
Lavetz... que'm tornèi maridar
Praubòt !

E lo rescapat de batalhas,
Praubòt !
Matat com d'un pos de mitralhas,
Praubòt !
Los uelhs engorgats que parti,
Shens diser adishatz ni merci...
Praubòt !

Despuish un praube hòu que canta,
Praubòt !
Quin triste sovenir l'espanta ?
Praubòt !
Que canta la guèrra e l'amor ;
Mes tot qu'ei grans crits de dolor.
Praubòt !