Bos-me dise, Pastourelette,
Perqu’em espies en biscor,
Et ço qu’im pouyré, beroüyette,
Dens toun esprit abé heyt tort ?...
A mench nou sie à la beillade,
Oun yougabem aüs croupillons,
Quoan pénitence m’estou dade
De ha semiailles de poutous.

Per co qui lou Soureil arraye
De maye renoum de balon,
You nou saüri dise malaye,
D’et abé dat drin de yalou.
Per pla qu’it bires la cournette
De trabès, enta ha boutec,
Aco n’ey que hum d’amourette
Qu’im abertech oùn ey lou houec.

À l’aüyou d’aquet houec aymable,
Lou mé cô tout esparpaillat,
Sen qu’arré d'aütan agradable,
Yamey nou l’abé coucirat.
Aü tou si plats û taü lengatye ;
Si t’y hides, s’it parech cla,
Bos que préguem lou bieilh maynatye
Per û bou cop de s’en mescla ?

Coum de fresque et nabère peìlle
S’habillen lou prat, lou bruchou,
Labets tout que s’escarrabeille,
Mey you qu’ad hey suber saisou :
Et, taü medich, las eslamettes
Doun m’adouceches la rigou,
Que t'en yuri per tas graciettes,
Non s’estuperan que dap you.